Tagata e le ato'atoa le malosi o le tino ma le mafaufau po'o i latou e mana'omia se fesoasoani fa'apitoa

Afai o oe, po'o se tasi o lou aiga po'o lou pitonuu e maua i ni ma'i o le tino ma le mafaufau po'o ni mea fa'apitoa e mana'omia e ono a'afia ai le mafai ona ola saogalemu i taimi o fa'alavelave fa'afuase'i faia loa i le taimi nei ni fuafuaga e maua ai ni fesoasoani o lo'o mana'omia.

Ia faia se so'otaga e galulue felagolagoma'i ai ma isi tagata

Ia faia sau oe lava so'otaga ma nisi tagata pe to'a tolu pe sili atu e mafai ona latou fa'ailoa mai ia te oe taimi o fa'ailoilo a le Puipuiga Lautele ma fesoasoani ia te oe pe a fa'atopetope ona ave'eseina mai oe i lou fale. O nei tagata e mafaI ona aofia ai lou aiga, tagata faigaluega o lo'o tausia ma va'aia oe, tua'oi po'o i latou mai le galuega.
Ia mautinoa ua i ai ni au fuafuaga ma ni tonu ua uma ona fa'ata'atia ae le i tutupu ni fa'alavelave. Fuafua foi mo nisi ituaiga o fa'alavelave ma tulaga le maalofia e ono afaina ai oe.
Fa'atalanoa ou mana'oga ma tagata o le a outou faifaimea faatasi, ina ia mautinoa e ia tagata le faiga o au masini ma nisi mea e ono fa'aaoga.
Ia fa'ailoa atu i tagata o lo'o lagolago ia te oe pe afai o le a e malaga ese mai ma lou fale.

Ia manatua fo'i:

Ia mautinoa ua i ai uma ni mea e te mana'omia mo lou ola saogalemu i taimi o fa'alavelave fa'afuase'i, ma ia tu'u uma i ai ni mea fa'apitoa e te mana'omia, ma lau ato e te alu vave ma oe ina ne'i te'i ua fa'atopetope ona ave'eseina oe mai lou fale.
Ia teu ia lava au vai talavai mo ni aso se fitu pe sili atu, ma ia faia se fuafuaga i vai e tatau ona teu i pusa'aisa.
E tatau ona fai ma tu'u i lou lima se fa'ailoga e fa'ailoa mai ai lou ma'i ma le tulaga o lou soifua maloloina.
Afai e te malaga, ia fa'ailoa atu i le pule o le fale talimalo mana'oga o lou ma'i ina ne'i te'i ua oso fa'afuase'i se fa'alavelave.
Ia e iloa tonu po'o fea e tatau ona e alu i ai mo se fesoasoani pe afai o lo'o e fa'amoemoe i ni masini fa'amama toto ma nisi masini e fesoasoani i lou soifua maloloina atoa ai ma ni ou togafitiga.

Leaga le fa'alogo

O leitio ma televise o le a fa'asalalau atu ai fa'amatalaga ma fautuaga a le matagaluega e feagai ma le Puipuiga Lautele atoa ma fesoasoani i taimi o fa'alavelave fa'afuase'i a 'o le i tupu pe o tupu mai fo'i se fa'alavelave fa'afuase'i. Fesili i au tagata fesoasoani e fa'ailoa atu ma ta'u atu ia te oe ni tala fou. Fa'afeso'ota'i le ofisa a lou itumalo o lata ane e fa'ailoa mai ai ni fa'ailoga ma fa'ailo o lo'o i totonu o lou nofoaga lautele.

Va'ai pe le ono fa'apipi'i ni fa'ailoilo e fetaui ma ou mana'oga e pei o ni fa'ailoilo e emoemo moli pe a ola ina ia faigofie ai ona e iloa. Toe sui ma'a o nei fa'ailoilo i tausaga uma. Va'ai pe le ono aveina se ki i lou tua'oi ina ia mafai ona latou fa'ailoa atu ia te oe ua tupu se fa'alavelave. Tu'u se api faitusi ma se peni atoa ai ma se moli uila i totonu o lau ato e te alu fa'atopetope ma oe ina mafai ai ona e talanoa atu ma isi tagata.

Leaga le va'ai

O tagata e le lelei ato'atoa le va'ai e ono fa'alagolago i isi tagata pe afai o le a o ese fa'atopetope mai i o latou fale pe o atu foi i ni nofoaga tutotonu o le a saunia e le vaega o le Puipuiga Lautele i taimi o fa'alavelave fa'afuase'i latou te le masani ai. Afai e i ai sau ta'ifau e ta'ita'ia oe, ia mautinoa le i ai o se ato ua tapenaina mo lau ta'ifau ma ia aofia ai mea'ai, vai talavai, fa'amaumauga o tui, fa'amaumauga ma ni fa'agutu mo lau ta'ifau. Ia teu nisi la'au to'oto'o fa'aleoleo e fa'aaoga i le fale ma le fale faigaluega e ui ina e fa'aaogaina se ta'ifau ta'ita'i. Ia manatua o meaola e ono a'afia tele i fa'alavelave. O meaola uma ua uma ona a'oa'oina i au'aunaga fa'apitoa o le a fa'atagaina lea i totonu o nofoaga e sulufa'i i ai tagata ma i latou e onaina. Siaki i le ofisa o lou itumalo mo nisi fa'amatalaga.

Le ato'atoa le malosi o le tino po'o le le lelei le fealua'i

Afai o oe po'o so'o se tasi o lo'o e va'aia e i ai ni ma'i o le tino pe faigata ona savali ma minoi solo, ia tu'u uma mea e fa'aaoga i totonu o lau ato e te alu fa'atopetope ma oe. O le a fesoasoani lea ia te oe pe afai e te alu'ese atu i se isi nofoaga e ese mai lou fale. I se mafui'e tele o le a atili faigata ai ia te oe ona e fealua'i i se mea mamao atu. Afai e le mafai ona e lafi i lalo o se laulau ma le saogalemu, soso i autafa o se puipui o le fale ma ia mamao ma fa'amalama ma ni meafale maualuluga e ono mafuli ifo ia te oe, ma puipui lou ulu ma lou ua pe a mafai ona fai. Fa'amau ma fai taofi o lou nofoa fa'ata'avale pe afai o lo'o i lou nofoa. Afai o lo'o e ta'oto i lou moega, ia ufiufi lou tino i ie 'afu ma palanikeke ma puipui lou ulu ma lou ua i aluga.

Le lelei le manava (sela) ma ni fa'afitauli i le manava

O tagata e le lelei le manava ona e ma'i sela pe e i ai fo'i ni fa'afitauli i le manava e tatau ona fa'aete'ete i le pefu, lefulefu mai mauga mu, po'o le popole e mafua mai se fa'alavelave fa'afuase'i. Ia mautinoa le i ai o ufiufi o foliga i le fale ma totonu o lau ato e te alu fa'atopetope ma oe ma ia lava ni vai talavai mo ni aso se fitu.

Mea'ai fa'apitoa e mana'omia

Afai o oe po'o so'o se tasi o lo'o e va'aia e i ai ni mea'ai fa'apitoa e mana'omia, ia mautinoa le lava o nei mea'ai mo ni aso se fitu pe sili atu i le fale, ma totonu o lau ato e te alu fa'atopetope ma oe. Afai e mana'omia le ave'esea fa'atopetope mai oe ma lou fale, o nofoaga e sulufa'i i ai tagata e leai ni mea'ai fa'apitoa e te ono mana'omia.