Te hunga hauā, whai matea tauwhāiti rānei

Mēnā kua pāngia koe, tētahi o to whānau, o to hapori rānei e te hauā, e te matea tauwhāiti rānei tērā pea ka awe i te putanga ora i tētahi ohotata, me whakariterite ināianei kia whiwhi ai i te tautoko ka hiahiatia.

Whakaritehia tētahi rōpū tautoko

Whakaritehia tētahi rōpū tautoko, kia maha ake i te tokorua, ki te whakatūpato i a koe mēnā he ohotata kei te haere, ki te āwhina i a koe mēnā me whakatahi i te whare. He pai noa te whānau, te hoa, te kaitiaki, te kiritata, te hoa mahi rānei.
Me whakarite e koe tetahi mahere ohotata i mua i te takanga mai o te parekura, me whakaharatau koutou ko to rōpū tautoko i tēnei. Kia āta whakaaro mō ngā parekura huhua nei.
Me whakamārama e koe o hiahia ki te rōpū tautoko, kia mōhio pai ai rātou me pēhea te whakamahi i ngā taputapu waiwai.
Whakamōhio atu ki te rōpū tautoko mēnā ka hararei, ka haere rānei koe ki wāhi kē.

Whai whakaarohia hoki:

Te whakarite kia whai rawa oranga ohotata koe, tae atu ki ērā taputapu motuhake ka hiahia koe, me tētahi pēke kawe mēnā me tere puta i te whare.
Te whakarite kia puritia o rongoā waiwai mō ngā rā e whitu; kia āta whakaaro mō ngā rongoā me pupuri ki te pātaka mātao.
Te whakamau i tō tapanga, kōmore whakatūpato hauora rānei kia kitea ai e te hunga kē atu he aha tō āhuatanga.
Te whakamōhio atu, i a koe e ripoi ana, ki te hunga hōtera/mōtera i ngā whakaritenga motuhake mōu kei tūpono mai te ohotata.
Te mōhio ki hea koe haere ai mēnā me whakawhirinaki koe ki te mīhini mate tākihi, tētahi atu mīhini whakaora rānei.

Te hunga e turi ana

Ka paohotia ngā tohutohu o Te Rākau Whakamarumaru mō te parekura i runga i te pouaka whakaata me te reo irirangi. Tonoa to rōpū tautoko ki te whakapā atu ki a koe mēnā ka puta te whakatūpatotanga. Whakapā atu ki ngā kaimahi o tō kaunihera ki te kimi i ngā kōrero e pā ana ki ngā pūnaha whakatūpato i te hapori.

Me whakaaro pea ki te whakarite i tētahi pere whakatūpato e hāngai pai ana ki a koe, pēnei i te rama e muramura mai ana hei whakatūpato. Whakahōutia ngā pāhiko i ia tau, i ia tau. Tēnā pea me hoatu i tētahi kī o to whare ki to kiritata kia taea e ia te whakamōhio mai i tētahi whakatūpato ki a koe. Kaua e wareware i te pepa me te pene rākau mō to kete pēke.

Te hunga e kāpō haere ana

Me whakawhirinaki pea te hunga kāpō, āhua kāpō rānei, ki ētahi atu ki te whakaputa i o rātou whare mēnā me whakatahi rātou me te haere ki tētahi Pōkapū Rākau Whakamarumaru tauhou ki a rātou. Mēnā he kurī ārahi tāu, whakaritehia tētahi pēke māna me te kai, te rongoā, ngā rēkoata kano ārai mate, ngā pepa tuakiri, me ngā taura kurī. Puritia ngā tokotoko maha ki te kāinga, ki te wāhi mahi hoki, ahakoa he kuri ārahi tāu, kāore rānei. Kia mōhio mai koe, ka tāhurihuri haere pea ngā kararehe i te wā ohotata. Ka whakaaetia kia noho ngā kararehe ratonga kua whakangungua ki ngā whare whakamaru ohotata i te taha o ngā rangatira. Whakapā atu ki tō kaunihera mō ētahi atu pārongo.

Te hunga whai hauātanga ā-tinana

Mēnā he uaua te hīkoi ki a koe, ki tētahi o to whānau rānei, kuhuna ngā taputapu hei āwhina i a koe ki to pēke kawe. Ma tēnei e whai oranga koe mēnā me haere ki wāhi kē. I te rū whenua, ka uaua te nuku, kāore rānei koe e āhei ki te nuku haere, nā te ngāueue o te whenua. Ki te kore koe e āhei ki te nuku pai ki raro i te tēpu, me haere ki te taha o tētahi pakitara tawhiti i te wini me ngā paenga teitei, kei taka ki runga i a koe. Kia pai rawa ka taea tō uhi i to māhunga me tō kakī. Rakaina ngā wīra o to kōrea. I roto i te moenga, kumea ngā paraikete me ngā hīti ki runga ake i a koe, me whakamahi i te pera hei ārai mō to māhunga me tō kakī.

Te hunga kua pāngia e te huangō

Ka kaha ake te pā o te puehu, o te pungarehu o te puia me te ahotea i te wā ohotata ki te huanga e pāngia ana e te huangō me tētahi atu mate hā. Me whakarite ngā ārai kanohi hā mō te kāinga me to pēke whai oranga, me whakarite hoki e koe ngā rongoā mō ngā rā e whitu i te itinga rawa.

Ngā whakaritenga kai motuhake

Mēnā me kai koe i ngā kai motuhake, whakaritea kia rahi ēnei mō ngā rā e whitu i te itinga rawa i te kāinga, i tō pēke kawe ohotata hoki. Mēnā me whakarere e koe tō whare, kāore pea i a ngā whare tiaki tāngata ngā kai motuhake tika māu.