Lolovai
Lolovai
Taimi o se lolovai pe o le a lata mai se lolovai
O lolovai o se fa'alavelave numera tasi lea fa'alenatura o Niu Sila ua sili ona mata'utia ona o le tupu so'o, tele mea e leiloloa ma faatama'ia ai ma ua avea ma fa'alavelave fa'afuase'i ua fa'ailoa mai e le Vaega mo le puipuiga lautele ma fesoasoani mai fa'alavelave fa'afuase'i. O lolovai e ono manunu'a ma maliliu ai tagata, fa'aleagaina ai fale ma auala, fa'aleagaina ai oloa ma lafumanu, ma fa'aleagaina ai le suavai ma le lau'ele'ele.
O lolovai e masani ona tutupu mai le umi ona mamafa o timuga po'o faititili ma e ono tutupu mai fo'i galulolo ma matagi malolosi mai le talafatai i le sami. O se lolovai e mata'utia tele pe afai:
- ua loloto tele le vai ma ua saoasaoa fo'i lona tatafe
- ua vave ona si'isi'i i luga le maualuga o le suavai
- o lolovai o lo'o tumu i otaota tafefea, e pei o la'au ma apa atofale
O le nofo saunia ae le i tupu se lolovai o le a fesoasoani tele lea i le fa'aiti'itia o ni mea e leaga o lou fale, po'o sau pisinisi ma o le a fesoasoani fo'i lea i le saogalemu o lou ola.
A'O LE I TUPU SE LOLOVAI
- Fa'amautinoa mai i le ofisa tutotonu o le pulega a lou itumalo pe ono a'afia le tulaga o lou fale ma sau pisinisi mai lolovai. Fesili i ai i ni fuafuaga fa'ata'atitia mo le ave'eseina mai o oe fa'atopetope ma ni fa'ailoilo o lo'o latou fa'aaogaina; pe fa'apefea ona fa'aititia le lolovai o lou nofoaga ma lau pisinisi i le lumana'i; ma ni vaega e tatau ona e faia mo au meaola atoa ma lafumanu pe afai e ave'eseina atu oe fa'atopetope.
- Ia e iloa le vaega maualuga e tatau ona e sola i ai ma ia e iloa pe fa'apefea ona e o'o i ai.
- Ia faia se Fuafuaga Fa'ata'atia mo lou Aiga. Ia tu'ufa'atasia ma fa'aleleia atili ni mea e te mana'omia mo oe ma lou aiga aemaise o se ato e te alu fa'atopetope ma oe.
- Siaki lau inisiua po'o lava le va'aia o oe.
TAIMI O SE LOLOVAI PE O LE A LATA MAI SE LOLOVAI
- Fa'alogologo i lau leitio mo fa'asalalauga fa'apitoa o le a maua atu ai ma ni fautuaga e tatau ma fetaui ma lou nofoaga lautele ma tulaga o lo'o i ai.
- Afai e te maua i ni ma'i o le tino, ia vave fa'afeso'ota'i le aufaigaluega e masani ona outou galulue e lagolago ia te oe.
- Fa'ata'ita'i ni fuafuaga ua uma ona fa'ata'atia mo taimi o fa'alavelave fa'afuase'i ma siaki lau ato e te alu vave ma oe. Sauni ina ne'i vave ave'eseina mai oe.
- Afai e mafai, aumai au meaola tausi i totonu o le fale pe tu'uina atu i se nofoaga malu ma saogalemu, ma tu'uina atu meafafaga ma lafumanu i ni vaega maualuluga.
- Fa'aaoga ni taga oneone e taofia mai ai le alu atu a le vai i lou fale.
- Tu'u uma meafale ma mea taua fa'apea vaila'au i se vaega maualuga mai le fola o le fale pe a mafai.
- Fa'atumu tapu ta'ele, tapu fulu mata ma ni paelo mama i vai mama ina ne'i te'i ua fa'aleagaina vai.
- Tape mea uma pe a fa'atonu atu e tagata ofisa aua e fesoasoani lea i le puipuia o lou fale ma lou nofoaga lautele. Se'i ese uma mai palaka ma uaea eletise e fa'aitiitia ai ni fa'aletonu tau eletise.
- Aua ne'i e taumafai e ave se ta'avale pe savali fo'i i se vai o lo'o tafe tetele se'ia vagana ai ua matua mana'omia.
PE A UMA SE LOLOVAI
- E ono le saogalemu ona e toe fo'i atu i lou fale e tusa lava pe ua mou malie atu le lolovai. Ia fa'alogologo pea i lau leitio mo fautuaga mai le ofisa o le puipuiga ma fesoasoani lautele i taimi o fa'alavelave.
- Fesoasoani atu i isi pe a mafai ona e faia, aemaise lava i latou o lo'o mana'omia se fesoasoani fa'apitoa.
- Ia tia'i uma mea'ai e aofia ai mea'ai tu'u'apa ma vai ua fa'aleagaina e le lolovai.
- Aua ne'i fa'aaogaina vai paipa e saunia ai mea'ai ma meainu se'i vagana ai ua e mautinoa ua mafai ona inuina, siaki i le ofisa o pulega i lou itumalo po'o le vaega o le soifua maloloina.
- Ia va'ai ma lipoti uma ni uaea, paipa ma nisi vaega ua fa'aleagaina.
- Afai ua fa'aleagaina lou fanua po'o lou fale, ia tusi uma i lalo ma pu'e ni ata mo le inisiua. Afai o lo'o e nofo i se fale totogi, ia fa'afeso'ota'i le pule o le fale ma le kamupani o lo'o inisiua ai au meatotino i se taimi vave lava.