Matagi Malolosi

O afa e ono a'afia ai ni vaega tetele ma e masani ona omai fa'atasi ma matagi malolosi, timuga mamafa po'o afa'aisa, faititili, uila, asiosio, ma le sousou o le sami. E ono fa'aleagaina ai fale ma auala, eletise ma isi mea, a'afia ai mea toto ma lafumanu, fa'aleaga ai au'aunaga, ma fa'aleagaina ai le talafatai ma nofoaga tulata i le sami.

O tala auili'ili i le Va'aiga o le tau ma ni lapata'iga o le leaga o le tau o lo'o tu'uina atu e le au'aunaga a le MetService ma e maua uma lea i ala fa'asalalau ese'ese, e o'o lava i i-meli, ma le ofisa a le Metservice.

A'O LE I AGI SE AFA MALOSI

Ia faia se Fuafuaga Fa'ata'atia mo lou Aiga. Ia tu'ufa'atasia ma fa'aleleia atili ni mea e te mana'omia mo oe ma lou aiga aemaise o se ato e te alu fa'atopetope ma oe.
Ia saunia lou fale ma lou fanua mo matagi malolosi. Ia va'aia ma taofia lelei i lalo ni mea mamafa pe ave esea ni mea e ono a'afia ai ni mea pe a agi malosi mai se matagi. Ia fai ma siaki so'o le taualuga o lou fale e fa'amautinoa o lo'o lelei ma saogalemu. Tusi ma lisi uma i lalo ni mea o lo'o fia saisaia pe tu'u i totonu o le fale pe a lapata'ia mai ni matagi malolosi.
Ia fa'alatalata mai ni mea e fa'aaoga e toe faaleleia ai fa'amalama e pei o tapoleni, pusapepa malo ma ni mea e fa'apipi'i ai.
Afai o fai sau galuega o le fa'aleleia atili o lou fale, ia fa'amautinoa le fetaui lelei ma fua o fale ua uma ona fa'ata'atia mai e le ofisa o faiga fale a Niu Sila e ono fa'aitiitia ai le leaga i afa ma matagi malolosi.
I galuega tau fa'atoaga, ia iloa po'o fea tonu le vaega o le fanua e sefe ma saogalemu mo manu mai lolovai, ele'ele solo ma uaea o moli eletise.

PE A TU'UINA MAI SE LAPATA'IGA, MA A'O AGI SE AFA

Ia iloa ma fa'alogologo lelei i tala fou o le tau. Ia fa'alogo i lau leitio aua e aumai ai uma fa'asalalauga ma fautuaga a le ofisa o le Puipuiga Lautele i taimi o fa'alavelave fa'afuase'i mo oe ma lou nofoaga lautele ma tulaga o lo'o i ai.
IFa'atino lau fuafuaga fa'ata'atia ma siaki lau ato e te alu fa'atopetope ma oe ina nei te'i ua vave ona ave eseina atu oe ma lou fale.
Teu malu ma tu'u uma i totonu ni mea e ono feavea'i e le matagi malolosi ma e ono lavevea ai nisi.
Ia tapunia uma fa'amalama, faitoto'a o fafo ma totonu. Toso ie o fa'amalama aemaise i luga o fa'amalama e puipuia mai ai i ni manu'aga mai fa'amalama ta'ei ma felelei solo.
Afai e malosi tele le agi a le matagi, ia soso ese ma faitoto'a ma fa'amalama ma ia fa'amalumalu i totonu o le fale.
O ala vai e ono a'afia fo'i o le ala lea e taua tele ai le fa'asaoina o ni vaiinu i totonu o paelo mama ma konitaina ma fa'atumu tapu ta'ele ma tapu fulumata i vai.
Aua ne i so'ona feoa'i i fafo ma taumafai ona aua ne'i o i ta'avale se'i vagana ai ua mana'omia lava.
O le motusia o le eletise e ono tupu fo'i ona o le leaga o le tau. Ave'ese uma mai mea e alu i le uila mai le palaka o le puipui o le fale ona e ono fa'aleagaina pe a motusia fa'afuase'i le eletise. Afai ua pe le paoa, ave ese uma mea tetele e ola i le eletise ona e ono fa'aleagaina pe a toe ola mai le eletise.
Aumai i totonu o le fale au meaola tausi. Ia tu'u atu au manu fafaga i se mea malu. Afai e ono ave esea mai fa'atopetope oe, alu ma ave au meaola tausi.

AFA 'AISA

I le taimi o se afa 'aisa, o le popolega tele o le leai lea o se mafanafana, eletise ma au'aunaga o feso'ota'iga, fa'apea le fa'aitiitia o sapalai pe afai e sili atu ma se aso se tasi a'o alu pea le afa 'aisa. E taua tele i tagata o lo'o nonofo i vaega e ono a'afia i afa 'aisa le va'ai i isi auala e ono maua ai se eletise e maua ai se mafanafana e pei o afi suau'u e maua ai se eletise.

Taumafai ona aua ne i o ese mai ma fale se'i vagana ai ua mana'omia tele aemaise lava pe a tu'uina mai se lapata'iga.
Afai e te alu malaga ia mautinoa ua e lava saunia ma ia i ai ni filifili mo le 'aisa, taga e moe ai i totonu, ofu mafanafana ma mea e mana'omia vave.
I le fale, siaki po'o lava le suau'u mo le ogaumu tafu i fafie, masini fa'amafanafana e alu i le kesi, masini kuka papakiu ma le afi suau'u.
Aumai i totonu o le fale au meaola tausi. Ia ave uma lafumanu i se vaega malu.
Afai ua sau se afa 'aisa a'o e i lau ta'avale po'o lau loli, nofo i totonu o lau ta'avale. Ta'i sefulu minute ma ki le ta'avale e fa'amafanafana ai le afi. Ia to'aga e inu vai ina ia aua ne'i e matelaina. Tatala fa'alaititi se fa'amalama e fa'aalu ai i fafo le ea o le carbon monoxide ae fa'asau i totonu se ea fou. Ia fa'ailoa atu oe i tagata o lo'o faia galuega lavea'i e ala lea i le nonoaina o se ofu lanuese malosi i le pou i fafo o le leitio a lau ta'avale ma ki pea le moli i totonu o lau ta'avale.

ASIOSIO

O asiosio e masani ona tutupu i nisi taimi i nisi o vaega o Niu Sila. O se asiosio o se vaega lauitiiti o le ea e ta'avilivili malosi agai ifo i le fogaeleele mai se ta'aviliga o faititili I le vanimonimo. O le fa'ailoilo masani atoa ma se lapata'iga o le fa'aumiumi lea o le pa'o, ma le leoleoa po'o le leotele o se ao o lo'o saoasaoa lana sau ma aumai uma mea e tau mai i ai ma e foliga mai o se fa'atumu.

Ia fa'ailoa atu i isi pe a mafai.
Ia vave loa ona lalafi i se mea malu lelei. O totonu i lalo o le fa'avae o le fale o le mea e pito i sili lea ona saogalemu. Afai e leai se nofoaga e maualalo na i lo'o le fola o le fale, ia vave ona alu atu i se isi vaega o le fale e leai ni fa'amalama o i ai ma ia i lalo o le fogafale i lalo o le fale. Ia lafi loa i lalo o ni meafale malolosi ma ufiufi lou tino i se fa'amalu po'o se palanikeke.
Afai na maua oe i fafo, ia soso ese ma la'au pe a mafai. Ta'oto taliaga i se 'autu o lata ane, po'o se pu po'o so'o se mea e maualalo i le ele'ele ma ufiufi lou ulu.
Afai o i totonu o se ta'avale, ia vave ona alu i fafo ma va'ai se mea e malu e lafi ai. Aua ne'i e taumafai e te lua mili ma se asesio pe moulu fo'i i lalo o le ta'avale e lafi ai.

PE A UMA SE AFA MALOSI

Fa'alogologo i lau leitio mo fa'asalalauga fa'apitoa o le a maua atu ai ma ni fautuaga e tatau ma fetaui ma lou nofoaga lautele ma tulaga o lo'o i ai.
Siaki mo ni manu'aga ma fesoasoani i isi pe a mafai, aemaise lava i latou o lo'o mana'omia se fesoasoani fa'apitoa.
Ia va'ai ma lipoti uma ni uaea, paipa ma nisi vaega ua fa'aleagaina.
Ia fa'afeso'ota'i lou ofisa fa'aitumalo pe afai ua fa'aleagaina lou fale po'o le nofoaga o lo'o e aumau ai.
Afai ua fa'aleagaina lou fale po'o au meatotino ia tusitusia uma i lalo, pu'e ni ata ma fa'afeso'ota'i le kamupani inisiua. Ia fa'afeso'ota'i le pule o le fale pe afai ua leaga se fale totogi o lo'o e nofo ai.
Fesili i lau ofisa fa'aitumalo mo ni fautuaga pe fa'apefea ona fa'amama ma tapenaina ni mea ua leaga ma le saogalemu.