Fuafuaga Fa'ata'atia mo lou aiga mo taimi o Fa'alavelave Fa'afuase'i

 

Talanoa i tamaiti laiti e uiga i fa'alavelave fa'afuase'i

Inisiua

 

Fuafua ina ia mafai ona e va'aia lava oe ma lou 'auaiga mo ni aso se tolu pe sili atu fo'i

O le tele o fa'alavelave fa'afuase'i e ono a'afia ai le tulaga masani o femalagaiga ma feso'ota'iga ma isi tagata. E ono fa'amalosia ai foi oe e nofo ai i lou fale, ua le mafai ona e fealua'i, pe ave'eseina mai oe fa'atopetope mai lou nofoaga. E faigata ma e le mafai e i latou o lo'o au'auna i fa'alavelave fa'afuase'ia ona fesoasoani atu i tagata o lo'o a'afia i se taimi vave lava pe a fa'ato'a uma se fa'alavelave.

O le taimi tonu lenei o le a ono afaina ai oe ma tele ai lou popole. O le ala lea e taua ai lou faia o ni fuafuaga fa'ata'atia mo oe ma isi o lou aiga mo ni aso se tolu pe sili atu i taimi o fa'alavelave.

Fa'atasitasia uma mai lou aiga ma i latou o lo'o tou nonofo fa'atasi ma faia ni fuafuaga fa'ata'atia e tou te malilie uma i ai. O ni fuafuaga lelei o le a fesoasoani lea i le fa'aitiitia o le popole ma le fefe i taimi o fa'alavelave le ma'alofia. E mafai ona e mauaina se lisi o nei fuafuaga ma mea e mana'omia mai le ofisa fa'aitumalo o lo'o e nofo ai pe e te tatalaina mai se kopi o lenei lisi mai le 'upega o feso'ota'iga ma lolomi le 'auivi o leneiFuafuaga Fa'ata'atia mo lou Aiga (PDF, 1.1Mb) mo taimi o Fa'alavelave Fa'afuase'i.

 

O lenei fuafuaga o le a fesoasoani lea ia te oe e:

• Fa'asino ma iloa tonu ai e le tagata ia le mea e tatau ona fai i taimi o nei fa'alavelave fa'afuase'i e pei o mafui'e, galulolo, mauga mu, lolovai po'o afa ma matagi malolosi.
• E fa'apefea ma po'o fea tonu e tou te toe fetaui ai i le taimi o se fa'alavelave aemaise pe a uma foi se fa'alavelave.
• Po'o fea e teu ai mea e mana'omia i taimi o se fa'alavelave fa'afuase'i ma o ai fo'i o le a faia ma ana galuega tauave le fa'aleleia atili o nei mea.
• O a mea e mana'omia i totonu o lau ato e te alu fa'atopetope ma oe ma o fea fo'i e tatau ona teu ai.
• O a ni mea e tatau ona e faia mo isi o lou aiga, tagata o le tou pitonu'u o lo'o maua i ni ma'i o le tino ma le mafaufau.
• O a ni mea e tatau ona e faia mo au meaola tausi ma au lafumanu.
• Fa'apefea ma o le a tonu le taimi e tapeina ai le vai, eletise ma le kesi mai le ki ogatotonu i lou fale po'o lau pisinisi.
  Tape le kesi pe afai o lo'o e masalosalo o lo'o liki pe mama, pe ua fa'atonuina atu oe e i latou e va'aia ia vaega. Afai e te tapeina le kesi e tatau ona toe fa'aolaina e se tasi fa'apitoa o nei vaega ma e ono faitau vaiaso fa'ato'a o atu e faia lea tulaga pe a uma se fa'alavelave.
• O a tonu ofisa fa'asalalau o leitio e tatau ona e fa'alogo i ai mo ni fa'amatalaga ma fautuaga mai le vaega o le Puipuiga Lautele i le taimi o ni fa'alavelave fa'afuase'i.
• Pe fa'apefea ona e fa'afeso'ota'ia le pulega o le tou itumalo ma le latou vaega o le Puipuiga Lautele mo taimi o fa'alavelave fa'afuase'i. 
  Afai ua lamatia se soifua po'o se fale, e tatau lava ona vili le telefoni numera 111 i taimi uma.

Fesili i le ofisa e pulea galuega i taimi o fa'alavelave fa'afuase'i i lou itumalo e uiga i ni fa'ailoilo latou te fa'aaogaina, ma vaega tonu o le a i ai nofoaga lautele e sulufa'i i ai tagata. E taua tele fo'i le iloa ma a'oa'oina o le faiga o le Fesoasoani Muamua (first aid) ma iloa pe fa'apefea ona tapeina ni afi sosolo laiti.

TALANOA I TAMAITI LAITI E UIGA I FA'ALAVELAVE FA'AFUASE'I

O matua ma i latou o lo'o va'aia tamaiti e tatau ona latou fa'atalanoaina tamaiti e uiga i ni fa'alavelave e ono tutupu i lou nofoaga ma e taua lo latou iloa o ni mea e tatau ona faia ina ia latou saogalemu ai. O le a fesoasoani lea i le fa'aitiitia o lo latou popole ma latou iloa ai le mea tonu e tatau ona fai.

INISIUA

Fa'amautinoa ua uma ona faia ma fa'afouina lau inisiua ma lava ma totoe aua taimi o fa'alavelave, ma ia vave ona e aveina ma oe ni pepa taua pe afai e fa'atopetope ona e alu ese atu ma lou fale.