He Taputapu Whai Oranga me te Pēke Kawe
He Taputapu Whai Oranga me te Pēke Kawe
Mō te nuinga o ngā raru ka ahei koe ki te noho ki tō whare. Me whakarite e koe ngā āhuatanga kia āhei ai koe ki te noho ki te kāinga mō ngā rā e toru. Whakaemihia ngā taputapu whai oranga mō to kāinga me tētahi pēke kawe mēnā me puta wawe i te whare. Ka pai mēnā ka whakarite koe i ēnei mea ki tō wāhi mahi me tō motukā.
HE RAUEMI WHAI ORANGA
- He rama me ētahi anō paepae hiko, he rama e whakahiko i a ia anō rānei
- He reo irirangi me ētahi anō paepae hiko
- He kākahu ārai hau me te wai, he pōtae me ngā hū motuhake, kaha hoki mō te hīkoi
- He pēke āwhina tūroro me ngā rongoā
- He paraikete he papangarua rānei
- Ngā mea mā ngā mōkai
- He pepa whērū me ngā pēke rāpihi nui mō tō wharepaku
- He ārai kanohi, he ārai puehu
Arotakehia ngā paepae hiko i ia toru marama, i ia toru marama. He pai ngā rama paepae hiko. Ehara te kānara i te mea pai, kei hinga i te wā o te rū, i roto rānei i te hau. Kaua e whakamahi i ngā rama karahīni nā te mea me whai hau māori – ehara mo roto i te whare.
Kia nui te kai me te wai inu mō ngā rā e toru
- He kai e kore e pirau (kai maroke me te kai i roto i te kēne)
- He kai me te inu mā ngā pēpi me ngā kōhungahunga
- He wai hei inu. Kia toru ngā rita ki ia tangata, ki ia tangata, i ia rā i ia rā.
- He wai hei tao kai hei horoi hoki
- He primus he rorerore hinu hei tao kai
- He huaki kēne
Arotakehia te kai me te wai inu i ia tau, i ia tau. He whakaaro pea ki te whakariterite i ngā kai me te wai inu mo te rua wiki kia rite ai mo te parekura roa pērā ki te mate urutā.
HE PĒKE KAWE
I ētahi wā me puta wawe koe i tō whare. Me whakarite koe i tētahi pēke kawe ki te kāinga ki te mahi hoki. Waihotia ki tētahi wāhi e tere ai te tiki atu. Kuhuna:
- He rama me te reo irirangi me ētahi anō paepae hiko
- Ngā taputapu motuhake pērā ki ngā mau taringa, ngā paepae hiko, ngā mohiti, ngā tokotoko hoki.
- He wai inu me ngā kai ngāwari ki te kawe pērā i te tiakarete me te kai maroke, kei roa koe e tatari ana ki te tangata āwhina. Mēnā me kai i ngā kai motuhake, kohikohia aua kai kia rahi mo te wā.
- He pēke āwhina tūroro me ngā rongoā
- Ngā mea tika ki te tiaki i te pēpi i te kōhungahunga rānei pērā i te kai pēpi, i ngā kope, i te mea tākaro pai rānei
- Ko ētahi anō kākahu (e kaha ana ki te ārai i te hau me te wai, me ngā hū motuhake, kaha hoki mō te hīkoi).
- He mea horoi – taora, hopi, ārai niho, kope wahine, pepa whērū
- He paraikete he papangarua rānei
- He ārai kanohi, he ārai puehu
- Ngā mea mā ngā mōkai
Kaua e wareware i ngā pepa hirahira mō tō pēke kawe; pepa tuakiri (rā whānau, mārena, kaitaraiwa, puka uruwhenua), pepa pūtea (inihua, mōkete hoki) me ngā taonga whakaahua whānau.
HE ĀWHINA TŪRORO
Mēnā ka whara tētahi o tō whānau i te parekura, he mea nui tō mōhio me pēhea te āwhina i a ia. E hia kē nei ngā rōpū e whakaako i te āwhina tūroro. He whakaaro pea ki te ako i taua āwhina tūroro, ki te haere ki ngā wānanga hei whakahōu i ērā akoranga. He kete āwhina tūroro kei ngā toa, māu anō rānei e mahi tāu ake.
Kei konei ngā kōrero mo ngā kete āwhina tūroro.