Te Waipuke
Te Waipuke
Ko te waipuke te raru tino kino i Aotearoa nei, ā, koia te pūtake o te nuinga rawa o ngā pūmate, o ngā ngaromanga, me ngā ohotata ārai mate whawhati tata kua whakapuakina ōkawatia. Mā te waipuke e whara ai, e mate ai te tangata, e tukitukia ai ngā whare, ngā rori, e whakamatea ai ngā kararehe o te pāmu, e tāhawahawatia ai hoki te wai me te whenua.
I te nuinga o te wā, nā te marangai haere tonu, nā te rautupu rānei te pā o te waipuke, engari i ētahi wā ko te tai āniwhaniwha, te āwhā ākau rānei te pūtake. Ka mōrearea te waipuke mēnā:
- he tino hōhonu te wai, he kaha rānei te rere
- he tere te puke haere o te wai
- e pōteretere ana i te wai he rāpihi pēnei i te rākau me ngā piharoa kōwakawaka
Mā te āta whakariterite i a koe anō i mua i te waipuke e iti iho ai te āhuatanga kino ka pā ki tō kāinga, ki tō pakihi hoki, e āwhina hoki kia puta ora koe.
I MUA MAI I TE WAIPUKE
- Pātai atu ki tō kaunihera mēnā ka noho whakaraerae ki te waipuke te wāhi e tū ai tō whare, tō pakihi rānei. Pātai mō ngā mahere whakatahi tangata, me ngā pūnaha whakatūpato tūmatanui; me pēhea te whakaiti iho i te tūpono waipuke ki tō whare, ki tō pakihi rānei; me pēhea te tiaki i ō mōkai me ō kararehe pāmu mēnā me whakatahi.
- Me mōhio koe kei hea te whenua teitei e tino tata ana me te huarahi ki taua wāhi.
- Whakaritehia tētahi Mahere Ohotata mo te Kāinga. Whakaemihia ngā Taputapu Whai Oranga mō to kāinga me tētahi pēke kawe mēnā me puta i te whare.
- Kia āta tirohia tō kaupapa here rīanga kia mōhio ai mēnā he rawaka te rahi e rīia ai tō whare.
I TE WAI E PUKE HAERE ANA
- Me whakarongo ki te reo irirangi o tō rohe ake, mā reira rangona ai ngā tohutohu o ngā kaiwhakahaere whakahaere ohotata mo tō hapori ake me tō tūāhuatanga.
- Mēnā he tangata hauā koe, whakapā atu ki tō rōpū tautoko.
- Whakatutukihia tō mahere ohotata mō te kāinga, kia āta tirohia tō pēke kawe atu. Kia rite mō te whakatahi tere ki te hiahiatia.
- Ina taea, haria mai ngā mōkai ki rō whare ki tētahi wāhi haumaru rānei, me te nuku i ngā kararehe ki te whenua teitei ake.
- Tērā pea me whakamahi ngā pēke onepū hei ārai i kuhu mai o te wai ki tō kāinga.
- Hikina ngā tino taonga me ngā paihana matū ki te paenga teitei rawa.
- Kei tāhawahawa haere te wai, whakakīa ngā tāpu kaukau, ngā puoto me ngā ipu ki te wai mā.
- Tineia te hiko, te wai me te kapuni mēnā ka tonoa e ngā mana kia pērā hei ārai i te potanga ki tō whare, hapori rānei. Tangohia ngā taura hiko o ngā taputapu iti kia kore ai aua taputapu e raru i te hīrere hiko.
- Kaua e haere ki waho hikoi ai i roto i te waipuke, kaua hoki e taraiwa motukā engari koa he mea tino waiwai kia pēnā.
WHAI MURI I TE WAIPUKE
- Ka mōrearea tonu pea te hoki ki tō kāinga ahakoa kua timu te wai. Kia kaha tonu te whakarongo ki ngā tohutohu ārai mate whawhati tata i runga i te reo irirangi.
- Āwhinatia ētahi atu, ina koa te hunga ka hiahia āwhina tauwhāiti.
- Karawhiua ngā kai kēne, kai aha kua tāhawahawatia e te waipuke.
- Kaua e inu wai mai i te kōrere, kaua hoki e whakareri i te kai ki te wai o te kōrere tae noa ki te wā e mōhio ai koe kāore i te tāhawahawatia. Ki te rangirua koe, pātai atu ki te kaunihera, ki te mana hauora tūmatanui rānei.
- Tukuna he karere ki ngā mana tika mēnā kua pakaru ngā aho hiko me ngā pū wai, pū kapuni rānei.
- Mēnā kua takakinotia tō whenua me ō rawa, tuhia ngā kōrero, whakaahuatia hoki mō ngā take rīanga. Mēnā he tangata rīhi whare koe, whakapā wawe atu atu ki te tangata nōna te whare me tō kamupene rīanga.