Te Āwhā

Ka rahi tonu te whenua e pāngia ai e te āwhā nui, ka kaha hoki te pupuhi o te hau, ka taumaha te āwhā, te hukarere rānei, ka uira, ka whaititiri, ka āwhiowhio, ka karekare hoki te moana. Ka tukitukia pea ngā whare, ngā rori, ngā pāmu, ngā kararehe o te pāmu, ka hē haere hoki ngā ratonga waiwai, ka waipuketia hoki te ākau.

Ka pāpāhotia ā-pouaka whakaata, ā-īmēra hoki ngā Whakatūpatotanga Huarere Kino e Metservice, ka kitea hoki i Metservice.

I MUA MAI I TE ĀWHĀ

Whakaritehia tētahi Mahere Ohotata mō te Kāinga. Whakaemihia me te tiaki i ō Taputapu Whai Oranga Ohotata mō to kāinga me tētahi pēke kawe mēnā me puta i te whare.
Whakaritehia tō whare me tō whenua mō ngā hau pūkeri. Whakamauria ngā mea taumaha ki te papa, tangohia hoki ngā mea ka taea te whiua e te hau hei pere mōrearea. Whakaritea kia rite tonu te ārohi i tō tuanui kia mōhio ai koe he whita. Tuhia ngā mea kia whakapirihia ki te papa, kia haria ki rō whare rānei ina matapaea ngā hau pūkeri.
Me tata ngā taputapu hei whakatikatika wini, pērā i te tāpōrena, i te paraki, me te tēpā whakapiri.
Mēnā e hanga ana, e whakahōu ana rānei koe i te whare, kia kaua e wareware ki te aro pai ki te ngā ture hanga whare o Aotearoa; kei reira te kōrero kia iti iho ai te pānga o te tukituki i te whare mā te āwhā.
Mēnā he kaipāmu koe, me mōhio mai ki hea whakanukuhia ai ngā kararehe kia tawhiti atu i te waipuke, i te whenua pāhekeheke, i ngā waea hiko hoki.

INA TANGI TE PERE WHAKATŪPATO MŌ TE ĀWHĀ, I TE WĀ O TE ĀWHĀ RĀNEI

Kia āta whakarongo ki ngā karere matahuarere. Me whakarongo ki te reo irirangi o tō rohe ake, mā reira rangona ai ngā tohutohu tino tika mō tō hapori me tō tūāhuatanga.
Whakatutukihia tō mahere ohotata mō te kāinga, kia āta tirohia tō pēke kawe kei tino tere tō wehe atu.
Whakapūmautia, whakanukuhia rānei ki rō whare, ngā mea ka rērere haere ina pupuhi kaha te hau.
Katia ngā wini o roto i te whare, o waho hoki. Katia ngā ārai wini kia kore ai te tangata e whara i ngā maramara wini e rērere haere ana.
Ki te pūkeri haere te hau, kimihia he wāhi haumaru i roto i te whare e tawhiti ana i ngā kūaha me ngā wini.
Ka raru pea te puna wai nō reira me whakarite ētahi ipu wai hei inu, whakakīhia hoki ngā tāpu kaukau me ngā tāpu iti ki te wai.
Kaua e haere ki waho, kaua hoki e taraiwa motokā, engari koa e tino āhei ana me taraiwa koe.
Ka kino ngā āhuatanga a Tawhirimātea, ka kore he hiko i ētahi wā. Tangohia ngā taura hiko o ngā mea paku ka pāngia pea e te hīrere hiko. Ka tapahia ana te hiko, tangohia ngā taura hiko o ngā taputapu kia kore ai aua taputapu e raru i te hīrere hiko.
Haria mai ngā mōkai ki rō whare. Whakanukuhia ngā kararehe ki te wāhi whakaruruhau. Mēnā me puta i te whare, haria ngā mōkai ki tō taha.

ĀWHĀ HUKARERE

Ko te tino raru o āwhā hukarere ko te ngaromanga o te hiko, o te mahana, o te ratonga waea me te itiiti noa iho o ngā rawa mō te ora mēnā ka roa ake i te rā kotahi te pānga o te āwhā. Me āta whakaaro te hunga e noho nei ki te wāhi e pangia ai ki āwhā hukarere i tētahi huarahi kē atu ki te mahi hiko, ki te whakamahana i te whare.

Kaua e haere ki wāhi kē mēnā ka puta te whakatūpatotanga o āwhā hukarere.
Mēnā he take hirahira kia puta ai i te whare, me whakarite kia tika ngā taputapu hei āwhina i a koe – he mekameka here wīra, he papangarua, he kākahu mahana, he taputapu whai oranga ohotata.
Kia rahi te wahie mō te ahi, kia rahi hoki te hinu mō te whakamahana, mō te rorerore, mō te pūrere hurihiko.
Haria mai ngā mōkai ki rō whare. Whakanukuhia ngā kararehe ki te wāhi whakaruruhau.
Mēnā ka mauria tō waka e āwhā hukarere, kaua e puta i te waka. Whakaharurutia te pūkaha i ia tekau meneti i ia tekau meneti kia noho mahana ai a roto. Me inu wai kia kore ai te tinana e maroke haere. Huakina pakutia te wini kia kore ai e pangia ki te paihana o te haukino waro. Herea tētahi kākahu muramura ki te pou irirangi, ki te kūaha rānei, ma reira e kitea māmātia ai koe e te kaiwhakaora.

TE ĀWHIOWHIO

I ētahi wā i Aotearoa nei, ka pā mai ana te āwhā, ka puta tahi mai te āwhiowhio hoki. Ko te āwhiowhio he hau whāiti, he hau pūkeri e pupuhi whakararo ana ki te papa mai i te pūtake o te āwhā whaititiri. Ko ngā tohu whakatūpato he haruru roa, he kapua paruparu e tere whakatata ana, he pūarero te āhua i ētahi wā.

Me whakatūpato i ētahi atu mēnā ka taea
Kia horo te kimi whakaruruhau. Ko te wāhi papararo te mea tino pai rawa. Mēnā karekau he rūma papararo, me kimi i te rūma wini kore kei te papa o raro iho. Me kimi whakaruruhau ki raro i ngā tēpu kaha, ā, uhi i a koe anō ki te whāriki moenga, ki te paraikete rānei.
Mēnā ka mauria koe ki waho, me tahuti atu i ngā rākau. Takoto ki tētahi awakeri, rua, kōawaawa, rānei, ki reira ārai ai i tō māhunga.
Mēnā kei roto koe i te motokā, kia tere te puta me te kimi whakaruruhau. Kaua e kaikape atu i te āwhiowhio; kaua hoki e kimi tāwharau i raro i te waka.

WHAI MURI I TE ĀWHĀ

Me whakarongo ki te reo irirangi o tō rohe ake, mā reira rangona ai ngā tohutohu o ngā kaiwhakahaere whakahaere ohotata mo tō hapori ake me tō tūāhuatanga.
Titiro i a koe anō mō ngā wharanga, ka āwhina i ētahi atu, ina koa te hunga ka hiahia āwhina tauwhāiti.
Rapua ngā aho hiko me ngā pū wai, kapuni hoki kua pakaru me te whakamōhio atu i ēnei ki ngā mana.
Whakapā atu ki tō kaunihera mēnā kua tukitukia tō whare.
Mēnā kua tukitukitia tō whenua, ō rawa rānei, tuhia ngā kōrero, whakaahuatia hoki me te whakapā atu ki tō kamupene rīanga. Mēnā he tangata rīhi whare koe, whakamōhiotia ngā potanga ki te rangatira o te whare.
Tonoa ngā tohutohu mai i te kaunihera kia tika ai te whakawātea i ngā parapara.