Te Whakatahi Whare

 

I ētahi wā, me whakatahi wawe koe i to kāinga, i to tari, i to kura, i to wāhi noho rānei.

 

I mua mai i te whakatahinga

• Whakamōhio i a koe ki ngā pūnaha whakatūpato o to hapori me ngā ara whakatahi, mai i ngā kaimahi whakahaere ohotata kei te kaunihera o to rohe.
• Whakaarohia ō kōwhiringa ikiiki, kei tūpono te whakaritenga me whakatahi koe. Mēnā kāore i a koe tētahi motukā, pātai atu ki ngā kaimahi whakahaere ohotata mō ngā mahere mō ngā tāngata waka tūmataiti kore.
• Whakamōhio i a koe anō ki ngā reo irirangi tika hei whakarongo māu, kia rongo i ngā pāhotanga mai i ngā kaimahi whakahaere ohotata o to takiwā.
• Whakaharatautia e koutou ko ērā katoa kei tō kāinga e noho ana o mahere whakatahi whare.
• Whakaritehia he whakaritenga kei whakatahi whare koe ki te taha o o hoa, ki o whānaunga e noho ana i to takiwā, i waho kē rānei i te takiwā e noho nā koe.
• Me mōhio pai koe i ngā ara whakatahi hei whai māu, me te whakarite i ētahi anō ara whakatahi, kei tukitukia, kei tūtaki hoki ētahi rori.
• Me mōhio ki te tūranga o ngā whare whakaruruhau, whare toko i te ora i to hapori.
• Mēnā he mōkai, he kararehe pāmu rānei āu, tuhia ngā whakaritenga ki o mahere ohotata.
• Ki te heipū tērā pea me whakatahi koe, whakakīa to motukā ki te penehīni. Kia maumahara – ka kore te hiko, kāore e taea pea e ngā teihana penehīni te whakahaere i ngā papu.

 

Mēnā kei roto koe i tētahi wāhi e whakatahia ai te tangata

• Me whakarongo ki te reo irirangi o to rohe ake, mā reira rangona ai ngā tohutohu o ngā kaiwhakahaere whakahaere ohotata mo to hapori ake me to tūāhuatanga.
• Kia tere te whakatahi i tō wāhi noho, mēnā koia ngā tohutohu o ngā mana whakahaere. Haria tō pēke kawe. Mēnā kei waho kē koe i te wāhi kua whakatahia ina tukua he whakatūpatotanga kaua e hoki atu ki taua wāhi mōrearea kimi ai i ō rawa.
• Mēnā ka whai wā koe, me raka to whare ānō nei ka wehe atu koe mō te wā roa.
• Mēnā ka whai wā, whakawetohia te hiko me te wai i ngā wāhi hononga o ēnei ki to whare. Kaua e whakaweto i te kapuni engari koa ka rongo koe i te haunga o te kapuni, i tētahi oro hī rānei, ka tohua rānei e ngā mana kia pēnā.
• Haria o mōkai ki to taha i to wehenga atu, ki te taea tēnā i runga i te haumaru.
• Me whakawātea tuatahi koe i to whānau me o kaimahi i mua i te aro atu ki ngā kararehe. Mēnā ka whai wā, haria ngā kararehe ki tētahi wāhi haumaru ake.
• Kei ngā tūāhua ohotata pēnei i te tai āniwhaniwha, te ahi taikaha rānei, he mea pai ake te wehe mā raro i te tatari ki tae mai tētahi waka.
• Whakamahia ngā ara i whakaritea e ngā mana o te rohe. Ka kati pea ētahi wāhi, ka mōrearea rānei nā reira kaua e pokotata haere.. Kaua e taraiwa mā te wai e tere ana. Mēnā ka tae koe ki tētahi tauārai, whāia ngā tohutohu.