Tafea´

 

Kimu'a 'i he hoko 'a ha tafea

Lolotonga 'a e hoko 'o ha tafea pe kuo mahino pau 'e hoko e tafea

Hili ange 'a e hoko 'a ha tafea

 

'Oku fika 'uluaki 'a e tafea´ 'i he ngaahi fakatamaki 'oku hoko 'i Nu'u Sila´ ni 'o makatu'unga 'i he lahi 'ene toutou hoko´, lahi 'a e ngaahi mole´ mo e ngaahi fakatamaki fakatu'upake kuo fakaha´. 'E ala fakatupu 'e he tafea´ ha ngaahi lavea pe mole 'o ha ngaahi mo'ui, maumau 'o e ngaahi 'api´ mo e ngaahi naunau lalahi 'o e fonua´, mole 'a e fangamanu´, pea faka'uliki foki 'a e vai´ mo e kelekele´.

'Oku ala fakatupunga 'a e tafea´ 'e ha ngaahi 'uha lalahi hokohoko pe ngaahi 'alotamaki 'oku ha'u fakataha mo e mana ka 'e toe malava foki ke tupu mei´ ha peau kula pe matangi 'i he tafa fonua´. 'E hoko ha tafea´ 'o fakatu'utamaki kapau:

• 'oku fu'u loloto 'a e vai´ pe tafe malohi´
• 'oku vave 'a e tupulaki pe fonuhake 'a e tafea´
• 'oku 'i ai 'a e ngaahi me'a, hange ko e 'akau mo e ngaahi kongokonga kapa 'ato 'i he vai kuo tafea´      

'E tokoni 'a e tokateu kimu'a 'i ha hoko 'a e tafea´ ke fakasi'isi'i 'a e maumau ki ho'o 'api mo e pisinisi´ pea tokoni atu foki ke ke matu'uaki.

KIMU'A 'I HE HOKO 'A HA TAFEA

• Ma'u atu mei ho'o kosilio fakakolo´ pe 'oku tu'u ke uesia 'a ho'o 'api´ pe pisinisi´ 'i ha hoko 'a ha tafea. Faka'eke'eke fekau'aki mo e ngaahi palani ki ha fetukutuku mo e ngaahi founga 'o e fakatokanga ki he kakai´; founga hono fakasi'isi'i 'o e faingamalie ko ia ke toe hoko ha tafea ki ho'o 'api´ pe pisinisi´ 'i he kaha'u´; mo e me'a ke fai ki ho'o ngaahi monumanu tauhi´ mo e fangamanu´ kapau 'e fiema'u ke ke fetukutuku.
• 'Ilo ki he feitu'u ofi taha 'oku 'i ai 'a e konga fonua ma'olunga taha´ mo e founga 'o e 'alu ki ai´.
• Fokotu'u ha Palani ki he Fakatamaki Fakatu'upake ki ho 'Api´. Tanaki mo tauhi ho'o Ngaahi Naunau ki hono Matu'uaki 'o ha Fakatamaki Fakatu'upake ma'a ho 'api´ pea mo ha naunau faingofua hono 'ave holo´.
• Vaka'i'i 'a ho'o founga malu'i´ ke fakapapau'i 'oku fe'unga 'a e ngaahi me'a 'oku kau ki ai´.

LOLOTONGA 'A E HOKO 'O HA TAFEA PE KUO MAHINO PAU 'E HOKO E TAFEA

• Fanongo ki he ngaahi fakamafola lea (letio) 'i ho feitu'u´ 'a ia 'e 'oatu ai 'e he kau 'ofisa ngaue ki he fakatamaki fakatu'upake 'a e ngaahi fale'i totonu taha ki ho komiuniti mo e tu'unga 'oku´ ke 'i ai´.
• Kapau 'oku 'i ai hao faingata'a'ia fakaesino pe fiema'u ha tokoni fetu'utaki ki ho'o ngaahi kakai pe kautaha 'oku nau poupoua koe´.
• Fakahoko 'a ho'o palani fakatamaki fakatu'upake ki ho 'api´ pea vakai'i mo ho'o naunau 'ave holo´. Mateuteu ke ke fetukutuku 'i ha taimi vave kapau 'e fiema'u.
• Kapau 'e lava, fakahu ki fale pe ki ha feitu'u malu 'a ho'o ngaahi monumanu tauhi´, pea 'ave 'a e fangamanu faama´ ki ha konga fonua 'oku ma'olunga´.
• Fakakaukau ke ke ngaue'aki 'a e ngaahi tangai 'one'one´ ke ta'ofi'aki 'a e vai´ mei ha'ane hu ki ho 'api´.
• Hiki ki he ma'olunga taha 'e ala lava mei´ he faliki´ 'a e ngaahi me'a mahu'inga 'i ho 'api´ mo ha ngaahi kemimale´.
• Fakafonu 'a e ngaahi topu kaukau´, ngaahi poulu tafitafi mo fufulu ipu´ mo ha ngaahi hina 'aki ha vai ma'a telia na'a 'uli 'a e vai´.
• Tamate'i 'a e ngaahi me'a faka'uhila mo kasa kapau 'e tu'utu'uni atu 'e he kau ma'u mafai. To'o mei´ he palaki´ 'a e ngaahi naunau 'uhila iiki ke fakasi'isi'i ha'anau uesia 'i he feto'aki 'a e 'uhila´.
• 'Oua te ke feinga ke ke faka'uli pe 'alu 'i he tafea´ tukukehe 'o ka 'oku fu'u fiema'u ke fakahoko.

HILI ANGE 'A E HOKO 'A HA TAFEA

• 'E kei malava pe ke 'ikai fakapotopoto ha'o foki ki 'api neongo ha holo hifo 'a e tafea´. Kei hokohoko atu 'a ho'o fanongo ki he ngaahi letio 'i ho feeitu'u´ ki he ngaahi fakahinohino fekau'aki mo e hao mo e malu 'a e kakai´.
• Tokoni atu ki ha ni'ihi kehe kapau te ke lava, tautefito ki he ni'ihi 'oku fiema'u tokoni makehe´.
• Li'aki ha ngaahi me'akai kau ki ai 'a e ngaahi me'akai kapa mo ha vai kuo 'uliki 'e he tafea´.
• 'Oua te ke inu pe ngaue'aki 'a e vai mei´ he tepi´ ki ho'o teuteu me'atokoni´ kae 'oua kuo´ ke fakapapau'i 'oku 'ikai 'uli. Kapau 'oku´ ke veiveiua, vakai'i ki ho'o kosilio fakakolo´ pe ma'umafai ki he mo'ui 'a e kakai´.
• Fakasio mo lipooti 'a e ngaahi uaea 'uhila pe halanga kasa kuo motu´ ki he kau ma'u mafai totonu´.
• Kapau 'oku maumau ho 'api´, tohi'i hifo hono fakaikiiki´ pea 'ai mo ha ngaahi ta ki he 'eke malu'i´. Kapau 'oku´ ke nofo totongi 'i he 'api´, fetu'utaki ki he tokotaha 'oku 'a'ana´ mo e kautaha malu'i´ 'i he 'uluaki faingamalie´.