Fetukutuku

 

'I he ngaahi taimi 'e ni'ihi 'e tu'utu'uni atu ke ke fetukutuku mei´ ho 'api´, 'ofisi´, 'api ako´ pe feitu'u´ 'i ha taimi fakatokanga nounou.

 

Kimu'a 'i he fetukutuku´

• Fekumi fekau'aki mo e founga fakatokanga 'i ho'o komiuniti´ mo e ngaahi halanga fetukutuku´ mei´ he kau ngaue ki hono tokangaekina 'o e hao mo e malu 'a e kakai´ 'i ho'o kosilio fakakolo´.
• Fakakaukau'i 'a e ngaahi founga fetukutuku 'oku ala 'ata atu´ telia na'a fiema'u ke ke fetukutuku. Kapau 'oku 'ikai ke 'i ai ha'o ka pe faka'uli ha ka, kole ki he kau ngaue ki hono tokangaekina 'o e malu 'a e kakai´ fekau'aki mo e ngaahi palani ki he kakai 'oku 'ikai ha'anau ngaahi me'alele taautaha´.
• 'Ilo 'a e ngaahi letio fakamafola lea ke ke fanongo ki ai´ lolotonga 'o ha me'a 'e hoko fekau'aki mo ha ngaahi ongoongo mei´ he kau ngaue ki hono tokangaekina 'o e malu 'a e kakai´.
• Talanoa'i mo ako'i ho'o ngaahi palani ki he fetukutuku´ mo kinautolu kotoa 'i ho 'api´.
• 'Ai ha ngaahi fokotu'utu'u mo ho ngaahi kaungame'a´ pe famili´ 'i ho feitu'u´ mo 'i tu'a 'i he feitu'u 'oku´ ke nofo 'i ai´.
• 'Ilo ki he ngaahi halanga fetukutuku'anga te ke ala 'alu ki ai´ pea palani mo ha ngaahi halanga kehe telia na'a poloka pe maumau 'a e hala´.
• 'Ilo ki he ngaahi feitu'u 'oku tu'u ki ai 'a e ngaahi fakamalumalu'anga hufanga ki he ngaahi me'a fakatamaki fakatu'upake pe tokoni 'i ho komiuniti´.
• Kapau 'oku 'i ai ha'o fangamanu tauhi, fangamanu pe monumanu faama, fakakau kinautolu 'i ho'o ngaahi palani fakatu'upake´.
• Kapau 'e ngali ke fakahoko ha fetukutuku, fakafonu 'a e tangike penisini ho'o ka´. Manatu'i kapau 'e motuhia 'a e 'uhila´, 'e 'ikai lava ke ngaue 'a e ngaahi pamu penisini´.

 

Kapau 'Oku ke 'i ha 'elia 'oku fetukutuku

• Fanongo ki he ngaahi fakamafola lea (letio) 'i ho feitu'u´ 'a ia 'e 'oatu ai 'e he kau 'ofisa ngaue ki he fakatamaki fakatu'upake 'a e ngaahi fale'i totonu taha ki ho komiuniti mo e tu'unga 'oku´ ke 'i ai´.
• Fetukutuku leva 'i he vave taha´ kapau kuo tu'utu'uni atu 'e he kau ma'u mafai´. 'Alu mo ho'o naunau 'ave holo´. Kapau 'oku´ ke 'i tu'a 'i he feitu'u 'oku fetukutuku´, 'oua na'a´ ke 'alu ki he 'elia fakatu'utamaki´ ke 'omi ho'o ngaahi nga'oto'ota´.
• Kapau 'oku 'i ai ha taimi, fakamaau 'a ho 'api´ ke malu 'i he anga maheni´ ko ia kapau ko ho'o mavahe 'i ha taimi loloa.
• Tamate'i 'a e 'uhila´ mo e vai´ mei he mita´ kapau 'oku kei 'i ai ha taimi. 'Oua te ke tamate'i 'a e kasa´ tukukehe 'oka 'oku´ ke namu'i ha'ane mama pe fanongo ki ha ongo 'oku puhi'i pe sisi, pe ko ha fale'i atu 'e he kau ma'u mafai´.
• 'Alu mo ho'o monumanu tauhi´ kapau 'e faingamalie.
• Kapau 'oku 'i ai ha'o faama monumanu, tomu'a fetukutuku ho famili´ mo e kau ngaue´. Kapau 'oku 'i ai ha taimi, 'unuaki'i 'a e fangamanu´ mo e monumanu´ ki ha 'elia 'oku malu ange´.
• 'I he ngaahi fakatamaki 'e ni'ihi hange ko e peau kula´ pe vela 'o e vaota 'e lelei ange ke ke 'alu lalo 'i ha'o faka'uli pe tatali ki ha me'alele.
• Ngaue'aki 'a e ngaahi halanga fononga kuo fakahinohino atu 'e he ma'u mafai fakakolo´. 'E 'i ai ha ngaahi 'elia 'e 'ikai lava ha fou ai pe fakatu'utamaki ko ia ai 'oua te ke ngaue'aki ha ngaahi hala tu'usi. 'Oua na'a´ ke faka'uli 'i ha vai tafe. Kapau te ke fou atu 'i ha fakangatangata, muimui ki he ngaahi faka'ilonga tafoki´.